Ля ложка хворай маці

Сярэдняя: 4.3 (7 галасоў)
Ты ляжыш не на ложку,
                                         а ў жытневым полі.
Мама!
Так мне рукі твае не балелі ніколі.
То пасланы ў пакоі не ходнікі —
                                                         саматканыя сцежкі-дарогі.
Мама!
Так ніколі твае не балелі мне ногі.

Я прыйшла, як заўжды, цішынёю тваёю сагрэцца.
Мама!
Так ніколі тваё не шчымела мне сэрца.
I ружовіцца дзень.
I жыты ўжо чакаюць за хатай,
А табой за паўвека так многа жытоў перажата!..

Ты на ложку ляжыш,
А здаецца, што ў сонечным полі.
Мама!
Так ніколі твая не балела мне доля.
Ты на ложку ляжыш.
                                     I прыціхла за хатай дуброва.
Мама!
Так ніколі, як сёння,
                                   Тваё
                                   Не балела мне слова.