Вазьму свой лёс і перайначу!..

Сярэдняя: 5 (2 галасоў)
Вазьму свой лёс і перайначу!
Як лёгка сказана! Мана:
Плачу за горкую удачу
Расянай кропелькай віна.

Яе на мой прыезд чаканы
Расціла мама цэлы год.
А год апаў, як ліст каляны,
А год гарчыць, як позні мёд.

З плячэй адкінуўшы турботы,
Імкнуся стаць я весялей
Ці не таму,
                    што адзіноту
Баюся выдаць на сяле?

Бо тут усё сваёй хадою:
I першы ліст, і першы гром,
I певень з поўняй маладою,
I Камарыха з Камаром.